l'Amie
RUSTIQUE,
Et autres vers divers,

Loing à l'escart, je suis encor en doubte
De reveller les maux que seul je gouste,
Mais mon martire et mon triste regret
Ne sera moins secret
Si le disant personne ne l'escoute.

Cruel amour ne te suffisoit estre
Roy des Citez sans te faire congnoistre
Aux pastoureaux? mais quel loz en as tu
D'employer ta vertu
Pour donner fin à leur repoz champestre?

Je scay combien ta flamme est violente,
Combien aussi ton ayde est froide et lente,
Dont je me sents de vie reculé
Comme l'arbre bruslé
Qui mort, demeure encor droict sur sa plante.

De toy provient la flesche qui me tue,
Gueris moy donq Amour et m'esvertue:
Et fay autant que les animaux font,
Dont les bras premiers sont
Faitz en Ciseau, et piquent de la queue.

Ja ja la force en moy est deffallie
Ja à mes os la seiche peau s'allie.
Fay moy donq grace ores s'offre le lieu:
Fay le au nom de ce Dieu
Qui fut pasteur neuf ans en Thessalie.

L'ame vaguant' à l'entour de ma bouche,
Ores tend l'aisle, ores la plie et couche:
Or le sejour or la fuite elisant:
Et mes nerfs à present
Sont comme ceux que sur la lire on touche.

Va ame donq, maintenant en est heure:
Va encor va, à fin que tost je meure.
Tu es par trop avare de mon bien:
Ah, tu le monstres bien,
Quand malgré moy au corps tu fais demeure!

Va puis que celle, ou mon oeil se repose,
Et qui au fonds de mon cueur est enclose,
Ne recongnoit comme sur mon bellier,
A son nom vien lier
A chasque bout des cornes une rose.

Et fay souvent que ma trouppe barbue
Porte en son col mainte chayne pendue
De belles fleurs que je prends cà et là:
Mais je voy que cela
En son endroict n'est que peine perdue.

O Nimphe ingrate un peu cest oeil retire
Dont la rigueur fait croistre mon martire:
Et s'il te plaist ayes ores pitié
De la grand' amitié
Que je te porte, et ne te l'ose dire.

Ceste couleur qui change, et ceste eau molle
Sortant des yeux, et la trouppe qui vole
De mes souspirs te le disent assez:
Les desirs tant pressez
Me font geller aux levres la parolle.

Si quelque fois pres de toy je m'advance
Ta main me poulse & se met en deffence:
Dont bien souvent je demeure confuz,
Mais que ferois tu plus
A ceux, lesquelz te voudroyent faire offence?

Ingrate encor! advant qu'en rien me touches
Tires ta robbe arriere: et à noz bouches
Ne veux souffrir le baiser souhaité:
Las tu fais grand cherté
D'un bien, lequel ne peux deffendre aux mouches.

Combien de fois je t'ay portée en croupe
Dessus mon Asne allant apres la troupe
De noz brebis: combien de fois aux champs
Aux espines trenchants
Dessouz tes pieds j'ay estendu ma joupe?

Combien de fois au bout de ceste roche
(Sur noz troupeaux ayant l'oeil tousjours proche)
Je t'ay faict part de mes fruicts delicats:
Helas ne cuide pas
Que je le die à present pour reproche.

Mais je le dy pour te mettre en memoire
Mon Amitié et te donner la gloire
D'avoir rengé mon cueur souz ton pouvoir
Ce que tard Cuidoy voir
Comme je voy que tarde es à le croire.

Tu le vois bien, et fains ne le congnoistre,
Tu vois qu'il n'est possible à aucun estre
Plus amoureux que moy qui tout suis tien,
Et si n'estimes rien
La grand' amour que sur toy je vien mettre.

Quand m'as tu veu d'un pied benin et grave
Marcher en place, et que ne fusse brave:
Poil sans peigner, Ceincture sans flocquetz,
Mon chappeau sans bouquetz,
Et que souvent ma face je ne lave?

As tu encor en ces lieux veu personne,
Qui de sa voix si haut et clair resonne
Que moy, et qui dansant semble voler
Jettant le pied en l'aer
Quand Piranel de sa musette sonne?

J'ay bien dequoy, à l'oeil tout me prospere,
Blé, vin, et laict abonde en mon repaire:
Tousjours à part j'ai dix francs sans esmoy:
Et ay qui sont à moy
Seize brebis au troupeau de mon pere.

Le seul amour que je ne te puis faindre
A regretter vient mon ame contraindre
Quand par ardeur celle que je poursuis
J'ayme, et aymé ne suis,
Las! n'ay je point matiere de me plaindre?

Ce roc biffront de jastres qui surmonte
Tous ses voisins, verra sa cheute prompte
Plus tost qu'amour laisse en moy d'avoir cours:
Car cela est tousjours
Quand on ne peut des ans scavoir le compte.

Apres ma mort cest' ame langoureuse,
De mon malheur se reputant heureuse,
Ferme sera tousjours en son propoz:
Mais loing est de repoz
Estant ainsi d'une ingrate amoureuse.

He mon Guiot.   G. He mon Carlin,
Ce grand dieu à tout bien enclin
Te doint santé.   C. Mais quelle chere
Despuis que ne t'ay veu.   G. Legere,
Tousjours plein d'amoureux soucy,
Qui me rend solitaire icy,
Ou tout plaisir m'est interdict.
C. Est ce par amour?   G. Tu l'as dict
C. Croys tu qu'ennuyeux soit d'aymer?
G. Ainsi ne le veux estimer.
C. Pourquoy donq si grand dueil te poingt?
G. C'est pource qu'on ne m'ayme point.
Et celle dont j'ay tant d'esmoy,
En ayme un autre plus que moy.
C. Moyen y ha pour y attaindre,
G. Mais l'amour ne se peut contraindre,
Ah Carlin à ma volonté
Mon dernier jour me fust compté
Lendemain de.   C. Tes nopces.   G. Non:
C. Guiot si tu me dis le nom,
Encor s'y trouvera remede.
G. Bien leger, si elle me m'aide.
Seulle me peut donner repos,
Mais pour achever mon propos,
Je voudroys estre ensevely
Apres avoir d'elle cueilly
Un seul baiser.   C. C'est peu de chose.
Dy moy son nom.   G. Son nom? je n'ose.
Tant de peur se mesle parmy
Mon amitié?   C. A ton amy?
G. Amy n'y ha tel que soy mesme.
C. As tu peur que le bruit je seme
De cecy? Guiot tu scais bien
Que je t'ayme.   G. Mais c'est grand bien
De couvrir tousjours ses secretz.
C. Ouy, fors aux amys discretz
Et je suis la fleur de ceux là,
G. Je ne diray jamais cela:
C. Et bien, et si je le devine?
G. Alors comme alors:   C. Est ce Andrine
La bergere tant fresche et gaye?
G. Tu as mis le doigt en la playe,
C'est elle sans autre, c'est elle.
C. Andrine! c'est bien la plus belle
Qui herbe onq de ses piedz foula:
Mais comment te dressas tu là?
Quel moyen euz tu, quel accez?
G. Certains jours avant le decez
De Robin son pere, j'estoy
Aupres de ce ruisseau.   C. Qui toy?
G. Ouy, moymesme: escoute donq:
J'apperceu venir tout le long
De ce pré, Andrine, laquelle
Ses brebis chassoit devant elle
Avec un rameau de pouplier,
Lequel par fois faisoit plier
Dessus la croupe ores de ceste
Ores de celle, et la doucette
Chantoit, scais tu une chanson
Si bien, qu'on s'endormoit au son
Si doux accord elle tenoit:
Et son troupeau icy menoit
Abrever: Or icy venue,
L'une et puis l'autre jambe nue
Lava: et moy estant derriere
En jeu, luy jettay une pierre,
Dont l'eau repoulsant en l'aer, royde
La baigna.   C. Estoit elle froide?
G. Dieu m'en gard! Car c'estoit au temps
Des Cigalles.   C. Or bien j'entends
Apres.   G. Subit je me retire.
C. Et elle?   G. Ne faisoit que rire.
Tenant l'oeil ouvert cà, et là,
Pour veoir qui avoit faict cela:
Mais j'estoy derriere un buisson
A couvert.   C. Ha mauvais garcon!
Bien cuidoit que tu feusses pres.
G. Or voicy le meilleur apres.
Je sors et m'approchant tout beau
Feis semblant la jetter en l'eau,
Qui m'embrassa.   C. De peur de choir?
G. Mais d'aise qu'avoit de me veoir,
Au moins me le sembloit ainsi:
Dont moy tresjoyeux de cecy,
Recourbay mes deux bras alors
A l'entour de ce tendre corps,
Et subit la vins embrasser:
Mais gueres ne l'osay presser.
C. Pourquoy non? Responds si tu veux.
G. De peur de la coupper en deux:
Tant la trouvoye gresle, et tendre.
C. ô je veux bien la fin entendre
Que s'en ensuit.   G. Mille propos
Qu'apres nous tinsmes à repoz
Tous deux assis au bord de l'eau:
C. D'amour?   G. Je ne fus pas si veau,
Des brebis du faict de mesnage:
Et ce pendant en mon visage
Je sentoys un feu monter,
Et le poux du bras se haster
Trop plus que n'avoit de coustume:
C. C'est signe quand Amour s'allume.
G. Ma langue begue devenoit.
Et quelque neble se tenoit
Aux yeux, les empeschant de veoir.
C. Amour aussi ha ce pouvoir.
G. Mes souspirs trouvants l'huys ouvert,
Se meirent tous à descouvert
Se pressans l'un l'autre à l'issue:
Que par la claye mal tissue
Noz gras troupeaux mieux ne se pressent,
Quand les bergers, peu cautz, les laissent.
C. C'est l'amour Guiot qui te poingt.
Mais ne la baisois tu point?   G. point.
C. Quand ton oeil son beau corps eut veu,
Tu en fus assez repeuz.   G. peu.
C. Ne te rendoit elle esjouy
Quand parler t'eut ouy?   G. Ouy,
Toutesfois le desir ardant
Que j'avoy en la regardant,
Combatoit avecques la crainte
C. Dequoy? qu'elle devinst enceinte?
G. He causeur: mais pource que j'ayme.
C. Comme font amans de caresme,
Qui ne touchent point à la chair.
G. Je l'ayme pour ne m'approcher
D'un tel abuz.   C. Donq et pourquoy
Avois si grand' crainte?   G. Or taiz toy.
Car aymant, aymé je ne suis:
Et ainsi ay vescu despuis.
C. Encor y ha bonne esperance.
G. Tresbonne, mais peu d'asseurance
C. Guiot que je sache le tout.
G. Tu en as veu presque le bout
C. Quelle faveur?   G. froide en saveur.
C. Que devins tu?   G. Un grand réveur,
Ennuyé de longue poursuite
C. Qu'en as tu pour la suite?   G. fuite
Et tout cela pour abreger
Qui fait les amans enrager.
C. A la fin ne t'approchois tu
Pres d'elle?   G. C'est bien entendu:
Approcher las! Tant qu'on vouloit,
Mais tousjours elle reculloit,
Fuyant de moi à sautz traynez:
Si qu'en bref fusmes destournez
Du lieu ou la trouvay seulette
Environ un traict d'arbaleste.
C. Et depuis?   G. A aymer l'induis:
Mais certes la chaine d'un puits
N'est si froide qu'elle se monstre:
Car par fois si je la rencontre
En chemin, et l'arreste là,
Hay dit elle laissez cela:
J'ay haste, laissez moy aller:
Si que loisir n'ay de parler
Un mot, tant se monstre farouche:
Et par tout là ou je la touche
Dit qu'elle ha mal.   C. Et tu la crois?
G. Pourquoi non, Carlin quelque fois?
Bien autre chose que je n'ose,
Quand ma main sur elle je pose,
La presser, tant je crains à l'heure
Que la piece ne me demeure
C. Ouy qui presser la voudroit
Comme quand un bois on romproit,
Ou trop tendre tu me la fais.
G. Ainsi qu'un petit beurre frais,
Et plus encore comm' il semble:
Mesmes hier quand estions ensemble,
Et sa main tendre alloys touchant
Comme on fait draps chez le marchand,
Ou ainsi que les toilles fines.
C. mon amy ce ne sont que mines,
Alors que ses propoz te dict
Ne rit elle?   G. Quelque petit.
C. donq elle t'ayme?   G. Ouy, loing d'elle.
Ma creance au moins en est telle:
Toutesfois le jour du dimenche
Elle ha une ceinture blanche
De moy, qu'elle porte souvent:
Souvent aussi port' au devant
De son front un' autre en guyrlande.
C. C'est figure que l'amour est grande.
Mais quoy? ne te donne elle rien?
G. Tu l'as dict, rien.   C. je m'entendz bien,
S'elle te donne quelque chose.
G. Je n'ay oncques eu qu'une rose
Laquelle en un brevet je garde,
Pour guerir de la fievre quarte
A un besoing: et pour icelle
Mon amy je t'asseure qu'elle
Despuis en cà, ha eu de moy
Deux cents bouquetz.   C. Or je t'en croy
Encor est prou qu'elle les prenne
G. Je dy sans ceux là que je traine
Tous les jours et moyen ne treuve
Pour les bailler, ô que j'espreuve
De maux ou plus un cueur se fasche!
Cuides tu Carlin que je sache
Qu'est de repos, il ha trois moys
Que couché ne me suis trois fois
En lict,   C. Que fais tu donq le seoir?
G. Le plus souvent me vay asseoir
A la rue, pres de sa porte
Et là ma musette je porte
Avec quoy je plaintz mes ennuys:
Je fais cela toutes les nuicts.
Mais de mon faict compte ne fait.
C. Pour autant qu'elle ne le scait.
G. Ne le scait! Qui ne le scauroit?
Mais qui le blyron n'ouyroit
De ma Musette à triple voix?
Veu mesmes que là mille fois
Pour sonner me suis allé mettre.
C. Sans veoir aucun à la fenestre?
G. Il est vray, ry t'en hardiment,
Quand l'amour eut commencement.
Un seoir me sembloit veoir parmy
La fenestre ouverte à demy
Andrine, encor me sembloit
Que d'un blanc linge s'affubloit
La teste pour n'estre congneuë,
Et au reste qu'elle estoit nue.
C. He ribaud!   G. Adonq je forcay
Ma musette par tel essay
Que l'on n'oyoit à l'environ
Fors son bly bly, blyron blyron
Dont m'en senty trois jours apres.
C. C'estoit elle au moins?   G. Quand de pres
L'euz regardée: he, he: je ris.
C. Je croy que là tu fus bien pris:
Que le faict bien tost me descouvres.
G. Brief c'estoit l'une de ses chevres,
Je ne scay comme l'ose dire.
C. Il y ha assez dequoy rire
Povre abusé!   G. Qu'y ferois tu?
C'est amour qui ha la vertu
D'aveugler et oster le sens.
Dire le puis: car je le sents,
Et l'ay senty il ha long temps.
Advise Carlin cy dedans,
Fais que ta main plus avant entre.
C. Je croy que la peau de ton ventre
Est plus seiche, maigre, et deffaicte
Que n'est celle de ta musette,
Il te faut pourveoir à cecy.
G. J'estois encores plus transi
Quand Robin fut mis au sarcueil
Et le temps qu'elle porta dueil.
Car n'osoy d'elle m'approcher:
Ma musett' aussi sans toucher
Demeura à un clou pendue,
Et jamais ne fut entendue
Fors le jour que son dueil laissa,
Et n'ay cessé despuis en cà
De chanter comme au paravant,
Mais ce n'est que chansons au vent.
C. Je mettroy peine à l'oblier,
Ou bien autrement la lier
Par amitié.   G. Quelle pitié!
C. Si ne peux de tout, la moitié,
Ton mal au moins en seroit moindre.
G. Tant souvent me suis venu oindre
De graisse de mulle: et en oultre
Tant souvent ay prins de la poudre
De ses piedz et l'ay avallée
En urine de bouq meslée:
J'ay cherché remedes nouveaux
Jusques aux plumes des oyseaux,
Qui sont de plus sinistr' augure:
Et toutesfois l'amitié dure.
Et pour me fair' aymer sans faincte
Au ciel n'y ha ny sainct ny saincte
Qu'express' oraison ne luy fasse:
Et par tout là ou elle passe,
Avec soy porte l'os senestre
D'une rayne, que je vins mettre
En un ply de sa robbe, ensemble
De l'oyseau à qui la voix tremble
Le cueur que je reduitz en poudre.
C. Mais comment peux tu cela couldre,
Qu'elle ne vinst contrarier?
G. Je le feis chez le couturier,
Au paravant que l'eust vestue.
Mais comme que je m'esvertue,
De tous coustez, je perds ma peine,
C. Quelque jour de ceste sepmaine
En parlerons plus amplement
A Dieu Guiot.   G. si promptement!
Encores le meilleur demeure.
C. Guiot, je sens approcher l'heure.
Pour joindre mes boeufz. Or adieu.
G. Tu me trouveras en ce lieu
Tousjours esloigné de repos.
Carlin?   C. Qu'y ha?   G. De noz propos
Mal aucun.   C. Voy, tu me fais rire
Cela s'entend bien sans le dire.

Nimphes qui par ces forestz
De Cerez,
Souffrez en voz ames naistre
Le feu, par qui vous bruslez,
Et voulez.
La fureur d'amour congnoistre.

L'amour dont parler je vois
Mille fois
Son arc contre vous desbande:
Nourrissant vous cueurs d'esmoy.
Quant à moy,
Point ne suis de vostre bande.

De ce traict qui tant vous poingt,
Je n'ay point
La force encor esprouvée:
L'aveugle Dieu qui vous fiert
Bien me quiert,
Mais encor ne m'ha trouvée.

Seulle me puis estimer
Sans aymer
Et veux bien souffrir qu'on m'ayme:
Car ce m'est grand heur d'avoir
Le pouvoir
Sur autruy et sur moy mesme.

Qu'on blasme de cruauté
Ma beauté,
Et que suis fiere et sauvage,
Il me vaut mieux l'estre aussi
En cecy
Que trop douce à mon dommage.

De vous toutes à l'escart
Seulle à part
Il me plait estre esloignée,
Vostre assemblée je fuis,
Et si suis
Mieux que vous accompaignée.

Voz tourmens et voz ennuys
Jours et nuicts
Font que l'oeil de pleurs se baigne.
Et ma gaye liberté
M'ha esté
Tousjours fidelle compaigne.

Voz cueurs de tristesse pleins
Or je plaints
Quand faut que l'amour y gise,
Le bien qu'on ha pour aymer
Est amer
Au regard de ma franchise.

L'oeil et le pied sans arrest
Tousjours prest
Suit le train de voz pensées:
Si que ne vous congnoissant
Plus de cent
Disent qu'estes insensées.

Le travail que vous menez,
Et prenez,
C'est pour au gré d'amour estre:
Mieux aussi n'ont que cela
Tous ceux la
Qui servent si jeune maistre.

A ce Dieu il vaudroit mieux,
Qu'eust les yeux
Ouvertz, et par modestie
Leur bandeau allast ostant
Le mettant
Sur plus honteuse partie.

Prenez visée hardiment
Au tourment
Qui en voz cueurs prend racine:
Vostre grand mal bien scavez
Et n'avez
Cure de la medicine.

Car vous toutes qui aymez
Estimez
Que voz peines langoureuses
Et voz travaux ne sont rien
Pres du bien
Qu'avez pour estr' amoureuses.

Je ne feis oncques l'essay:
Bien je scay,
Que la pein' y est tresgrande:
Pource que l'ennuy qu'on prend
Est plus grand
Quand un aveugle commande.

D'amour pressée je suis:
Mais je fuis
Ceux, ou vostre mal consiste,
Et quand se dressent à moy
Je les oy:
Mais le cueur tousjours resiste.

Comme le jonc droict et beau
Ploye en l'eau,
Et tourne en son premier estre,
G. hem, hem.
A. La bouche incline à leurs dictz,
Mais tandis
Mon cueur est tousjours le maistre.
G. Mais que vous sert de venir mettre
Le feu en mon cueur langoreux,
Et me contraindre estre amoureux
Si l'oeil à pitié ne s'encline?
A. Que dites vous?   G. Que dis je Andrine?
Il n'y ha pire sourd au monde
Que qui le fainct.   A. Ains qu'on responde
Il faut bien scavoir qu'on demande,
Car de respondre ains qu'on entende
Ce sont termes de filles folles:
G. A bon entendeur peu parolles.
Je dy que l'amour me surmonte
Et vous n'en faittes point de compte.
Mais fuyez quand je vous appelle.
A. Quand?   G. Mesme à cest' heure.   A. Quelle?
G. Quand suis venu icy passer.
A. J'ay bien ouy quelqu'un tousser,
G. C'estoit moy.   A. Je ne viens point, non,
S'on ne m'appelle par mon nom.
Guiot il faut faire cela
A celles je les laisse là,
Et non à moy.   G. Pour Dieu mercy.
Helas le prenez vous ainsi.
A. Je vous pardonne.   G. A l'advenir
Autre moyen viendray tenir.
Ma Perle si vous vient à gré,
Tandis que l'herbe de ce pré
Sert de pasture à noz brebis
Entendez s'il vous plait mes dictz.
A. Je le veux bien Guiot, pourveu
Qu'ilz soyent bons.   G. Pas ne m'avez veu
Desbordé jamais en propoz:
Pource mettons nous à repoz
Pres ceste haye hors la voye.
A. Mais en lieu que chacun nous voye.
G. Souz cest amandrier,   A. je le veux.
G. Divin tronq, ô l'un des neveux
De ceste amante fortunée,
Pour s'estre elle mesme donnée
Ce que je poursuis pour Andrine.
A. Quoy?   G. Ce que la vie extermine.
A. Il faudroit dire la raison.
G. Tant m'ennuye ceste prison,
Ou par rigueur mon cueur avez.
A. Guiot, je croy que vous révez,
Que j'ay prison, ou est la porte?
Ou sont les clefz? si je les porte,
Sus prenez les d'autorité,
Et mettez vous en liberté.
Prisons Guiot! Je n'en ay point.
G. C'est Amour qui au cueur me poingt,
Et toujours apres vous me tire
Avec la chayne de martire,
Scait on pire prison que là?
A. Ouy si vray estoit cela
Que vous m'aymez.   G. En doutez vous?
Contre moy puissent estre tous
Les hauts cieux, si c'est autrement:
A. C'est la coustume d'un amant
De jurer, et mentir ensemble.
G. M'estimez vous tel?   A. Il me semble
Que tous parlez de mesme voix.
G. Mais est ce la premiere fois
Que je vous ay dit ma pensée?
Comme l'amour fut commencée
En ce lieu mesme à mon dommage?
Ce ruisseau en rend tesmoignage
De mes pleurs augmente souvent:
Mes souspirs compaignons du vent
Ont vollé despuis front à front
A Ostre, lequel n'est si prompt
A Porter la pluye en ces lieux.
Qu'ilz sont à l'endroit de mes yeux.
A. Si le train vous est tant amer,
Pourquoy ne laissez vous d'aymer?
Car n'est bon mettre son courage
En lieu dont peut venir dommage.
G. L'espoir seul me rend poursuivant.
A. L'espoir nous trompe bien souvent.
G. Vous y pouvez remedier,
A. Ailleurs faut secours mendier.
G. Pourquoy?   A. Je ne veux point aymer.
G. Vous voulez vous faire blasmer,
Andrine dittes autrement.
A. Aymer bien, mais egallement
Un chascun,   G. l'incongnu autant que ceux là
Que congnoissez? A. Non pas cela.
A ceux cy j'ay plus d'amitié.
G. Je suis venu à la moitié
De mon desir: et à ceux cy
Portez vous amour tout ainsi,
Fassent plaisir ou desplaisir?
A. Plus à ceux qui me font plaisir.
G. Et qui plus en fait plus l'aymez?
A. Ainsi faut bien que l'estimez,
Si en eux je le puis congnoistre.
G. Sur moy donq en devez plus mettre
Que sur tous vos congneus.   A. Pourquoy?
G. Car qui vous cherit plus que moy?
Qui fais pour vous, et plus vous ayme
Que tous voire plus que moy mesme.
A. Vous le dittes.   G. Car il est vray.
Et tousjours cest' amour suivray,
Tant qu'au monde seray vivant.
A. Ce ne sont que propoz au vent.
G. Ce que je dy est tout notoire,
A. Toutesfois je ne le puis croire.
G. ô temps pervers, et rigoureux
Qui fais que l'amour langoureux
N'est plus congneu par la parolle,
Par les souspirs, ou par l'eau molle
Des longs pleurs qui furent jadis
Ses messagers, mais à mes dictz
Semble qu'avez l'oreille close.
A. Je ne vous puis dire autre chose
La faute ne vient point du temps.
G. de qui donq.   A. des menteurs amants,
Disans qu'amour au cueur les touche:
Mais cela ne passe la bouche.
G. Si mal pour le coulpable en sent
S'en faut il prendr' à l'innocent?
A. Vos amitiez sont d'une sorte.
G. Horsmis que la mienne est plus forte,
Plus loyalle constante et ferme:
Aussi telle que je l'enferme
Dens mon cueur la pouvez congnoistre!
A. A vous tient.   G. Je ne la puis mettre
A veuë d'oeil plus que je fais.
Vous en avez veu les effectz
Jusqu'icy: tesmoings les ennuiz
Qui me font aux plus froides nuictz
Vaguer seul en cent mille parts,
Ou entre mes vains pas espars
Je mesle chansons amoureuses,
Et au sort des nuictz malheureuses
Jusqu'icy ay mes jours passez
Avec les autres insensez,
Moins que moy toutesfois aymans,
Moins aussi ayans de tourmens.
Lieu aucun on ne peut trouver,
Ou mon couteau puisse graver
Que vostre pourtraict n'y soit veu,
Et au pied cest eternel voeu
Le cours du monde cessera
Quand Andrine en obly sera:
Aux escorces des plus hautz trembles
Vous en trouverez mill' exemples
Pour peu qu'on suive ces marchetz,
Et plus encor dens les forestz
Ou par tout est le nom d'Andrine:
Encor dites que suis indigne
Que m'aymiez!   A. je ne l'ay point dit.
G. Qu'est ce que nier le credit?
A. Quel credit?   G. Ou l'amour aspire.
A. Je ne scay que cela veut dire.
G. Mais faites semblant ne l'entendre.
A. Mon esprit ne se peut estendre
Jusques la.   G. J'entends un baiser
Pour mon long travail appaiser,
Ou conviendra qu'icy je meure.
A. Ha pour un baiser ne demeure.
G. La vie au corps m'avez enclose.
A. Vous vivez bien de peu de chose.
G. Helas oseray j' advancer
La main:   A. C'est à recommencer,
A mon vouloir qu'ailleurs je feusse.
G. Oster vous vouloye une puce,
En devez vous estre faschée?
A. Si vostre main n'eusse arrachée
Encor l'advanciez par delà,
G. Vers voz tetins:   A. Apres cela
En autre lieu la voudriez mettre.
Aujourd'huy l'amour est si traistre
Et fait prou qui s'en peut garder.
G. Qui si pres voudroit regarder,
Plaisir seroit de nous chassé
A. Ou est l'amour du temps passé
Nourrie des seules parolles
Sans user de ces mines folles
Du baiser, de l'attouchement:
Ou est ce bon temps que l'amant
S'estimoit adonq tresheureux
D'un oeil gay, d'un rire amoureux
Et lors tous estoyent si contens.
G. Comment parlez vous de ce temps,
Vous qui ne faictes que venir?
A. Plusieurs propos en oy tenir
Aux vieilles la nuict en yver.
G. Les vieilles ne font que réver.
A. Elles parlent comme discrettes:
G. Mais plus tost se voyans distraittes
Des jeunes ans, ausquelz nous sommes,
Tenues en mespris des hommes,
C'est dont parlent comm' ennuyées:
Si de pouvoir sont desnuées,
Encores le vouloir demeure:
Mais qu'arrestez vous à cest' heure?
De mon faict, las je vous supply
Que ne le mettiez en obly,
Et croyez que la grand' langueur
Que la bouche dit, vient du cueur,
Non d'ailleurs, tant abonde en luy.
A. Certes l'amant remply d'ennuy
Sent geller ses mots en la bouche,
Et ceux à qui ce mal ne touche,
Ont le babil ainsi qu'ilz veulent
Se rient se plaignent, se deulent:
Dont semblent (pour le bruit qu'ilz font)
Aux tonneaux lesquelz vuides sont,
Qui mieux resonnent que les pleins,
Ce n'est que faincte que leurs plainctz
G. En faittes vous si peu de compte?
A. Mais quoy Guiot n'avez vous honte
De me fair' accroire cecy?
G. O mort que ne viens tu icy?
Ou que l'amour de mon cueur s'oste.
A. Vous cuidez trouver une sotte.
Adieu: cherchez party ailleurs.
G. Ma part seront souspirs, et pleurs
Avec le nom d'estr' amoureux,
Mais de tous les plus malheureux.
Toutesfois en ma longue attente
Si desir nuict, espoir contente:
Espoir j'entends s'elle ne m'ayde
De chercher la mort pour remede.

Haste le pas meurdriere, haste le pas
Pour advancer le jour de mon trespas,
Et de tes pieds vien le feutre arracher,
Si que je t'oye à dru galop marcher
Fier' apres moy: car mourir je desire
Plus que tu n'as la main prompt' à m'occire.
Que tardes tu? ne me sois point rebelle,
Couppe chemin, & vien quand je t'appelle:
Tu vas à cil qui te fuit, et evite.
Que ne viens tu à celuy qui t'invite?
Rompre le fil duquel le Ciel hautain
Ma vie alonge, à mon tresgrand desdaing?
Fais tu la sourde? ouvre l'oreille & m'oy,
Qui fors toi peut m'oster de cest esmoy?   Echo. Moy,
G. Ceste responce ha mon cueur resjouy,
Es tu Echo qui plaindre m'as ouy?   E. Ouy.
G. Tu vois les maux dont ma vie est si plaine
Dy moy quel fruict puis j' avoir de ma peine?   E. Hayne.
G. Las quel remede à ce dueil qui me mord!
Qui ostera de mon cueur ce remort.   E. Mort.
G. Comment Echo est ce que tu l'entendz?
Je la desire et icy je l'attens.   E. Tens.
G. Quoy? un cordeau? si tendre je le doy,
Qui se pendra là ou je ramentoy.   E. Toy.
G. Puis que seray je icy laissant de vivre
Quand aux langueurs que l'amour me delivre.   E. Livre.
G. Las respon moy, n'auray je quelque bien,
L'esprit laissant ce monde terrien.   E. Rien.
G. N'auray j' au moins ce grand heur, que mon nom.
Viv' apres moy par immortel renom?   E. Non.
G. Andrin' au moins, pour qui l'amour me poingt
Me pleurera me voyant en ce poinct?   E. Point.
G. Point! quand verra à mon col le cordeau,
Et ce corps mis apres dans le tombeau?   E. Beau.
G. Las comment beau le voudroit elle dire!
Celle pour qui tant je pleur' et souspire.   E. Pire.
G. Quel advantage aura me voyant cloz
Dans le tombeau rongé jusque à l'os?   E. Loz
G. D'estre homicide? ou à ceste cruelle,
Qui pour tel faict lui donra loz et gloire.   E. Elle.
G. Ceux qui du faict auront esté tesmoins,
Me donront ilz quelque louang' au moins?   E. Moins.
G. Quel me diront moy pendu par le col,
Quand pour aymer de vivre ay esté soul?   E. Fol.
G. Ceux qui sont morts d'amour, qui tout surmonte,
Quel fruit en ont receu par fin de compte.   E. Honte.
G. Je ne scay donq si recull' ou m'advance,
Puis que si maigr' en est la recompence.   E. Pance.
G. Mourir m'est grief! Mais l'amour que je porte,
Me fait souffrir mille morts d'une sorte.   E. Sorte?
G. Pour la sortir et la deschasser loing:
Mais que faut il que j'aye à ce besoing?   E. Soing.
E. J'ay eu grand soing de l'oblier aussi,
Mais tout cela encor ne m'ha suffy.   E. Fy.
G. Dequoy, de femme? helas, quand l'amour playde
Contre raison, ou puis j' avoir remede?   E. Ayde.
G. Me puis j' ayder encontr' efforts si grands?
Mieux me vaudroit la mort que j'entreprends.   E. Prens
G. Il y ha chois de laisser ou de prendre:
Las! que me faut pour l'un d'eux entreprendre,   E. Rendre
G. Ou ha raison? l'ame en est trescontente,
Mais l'amitié est tousjours resistante.   E. Tente.
G. Faut il rien plus pour garder que croissans
Ne soyent les maux que par amour je sents?   E. Sens.
G. Sens & amour mesme lieu ne recoit:
Car ou est l'un, l'autre ne se concoit.   E. Soit?
G. S'il est ainsi que recevray j' au cueur
Si le bon sens sur l'amour est vainqueur?   E. Heur.
G. Et mes esprits estant desvelouppez
Des grands travaux dont ores je me paistz?   E. Paix.
G. Paix est tresbonne, et la fait bon acquerre.
Que reste à cil qui l'amour veut requerre?   E. Guerre.
G. Mais qui sent plus les efforts de sa flamme?   E. L'ame.
G. Que faut fuir pour conserver la fame?   E. Femme.
G. Mais que devient par amour l'homm' excort?   E. Ord.
G. Qu'est besoin estr' encontre son effort?   E. Fort.
G. Qui est cil dont amour le sens hebete?   E. Beste
G. Et dont la vie en moeurs est plus adroite. E. Droite.
G. Donques Echo si on te vouloit croire,
Ne faudroit point d'amour avoir memoire.   E. Voire.
G. Voire, mais quoy? à sa grandeur supréme
Je veux porter amour plus qu'à moymesme.   E. Ayme.
G. Or donq je vay à Andrine à recours,
D'amour luy faire autre nouveau discours.   E. Cours.
G. Courant y vay, encor que me trouva
Bruslant, en froid espoir dont me priva.   E. Va.
G. Fuy fuy meurdriere, or fuy t'en hardiment,
Car j'ay espoir appaiser mon tourment,
Tant me confi' en sa misericorde:
Par amour donq, si quelque trist' amant,
Vouloit ses jours avancer promptement
Qu'il mont' icy je luy quicte la corde.

Mon cueur souffre grand martire,
Mais le dire
Permis, certes ne m'est point.
Las! c'est bien estrange chose
Que je n'ose
Monstrer le mal qui me poingt.

Ma douleur ha longue traitte,
Et secrette,
Vivement se fait sentir:
Peu à peu consommant l'ame
D'une flamme,
Qu'on ne pourroit amortir.

A fin que plus haut ne monte,
D'aide prompte
Au mal visibl' on pourvoit,
Le mien donques perdurable
N'est curable
Despuis que l'oeil ne le void.

Le sang de ma playe vive
Ne derive,
Au moins qu'il soit evident,
Voilà pourquoy ma meurdriere
Ha matiere
Pour couvrir tel accident.

Et lors que ma navr' austere
Je veux taire,
Est plus forte la moitié
Et tenant sa violence
En silence
Croistre sans mon amitié.

En tout temps ma play' ouverte
Tien couverte,
Dissimulant ma douleur,
Fors à celle que j'honore,
Car n'ignore
La source de mon malheur.

De mon mal rud' et extreme
Elle mesme
Seul' est cause, mais aussi
Je scay que d'elle procede
Le remede
Pour reparer tout cecy.

O Beauté tres estimée,
Et aymée
De moy si parfaictement:
Fay que ta rigeur s'appaise,
Et te plaise
Donner fin à mon tourment.

Helas amour pourquoy
Environnes d'ennuiz
Moy qui ne veux ne puis
Resister contre toy?

Loué tu serois bien
De vouloir molester
Ceux qui au pouvoir tien
Presument resister.

Je scay que ta pitié
Incessamment me fuit,
Car froyde est l'amitié
Si le tourment ne suit.

C'est dont les maux je sens
Que tu me fais avoir,
Qui sans mort recepvoir
Tousjours ilz sont naissans.

Vien vien contre moy donq
En ire t'enflammer.
Le mal sera bien long,
Si je laisse d'aymer.

Maugré rigueur, et cruauté
Par trop contraire à mon desir,
L'oeil amoureux de ta beauté
A te veoir recoit grand plaisir
Si fresche et blonde,
Aussi il ne peut moins choisir
En tout le monde.

Le cueur d'amour passionné
Se plaint de l'oeil incessamment,
Car par sa veuë il ha donné
A sa flamme commencement:
Et tendr' et molle
Print son entier avancement
De la parolle.

Le jour que je vins amoureux,
Je ne scay si nommer le doy,
Ou bien heureux, ou malheureux:
Je le voudrois scavoir de toy:
Mon grand martire
Certes me donne assez dequoy
Pour en mesdire.

Je travaille de mon costé
A te monstrer mon grand esmoy,
Je parle et ne suis escouté,
Tant fais tu la sourd' envers moy:
Si je te prie
Aucune responce je n'oy
Bien que je crie.

L'amour se fait congnoistre
Quelque fois jeune enfant,
Mais tout à coup vient croistre
Alors qu'on le deffend,
Qui des cueurs se rend maistre
Et les va eschauffant:
Et si à poinct
Les picqu' et poingt,
Qu'au mesme poinct
Les rend que point
N'ont contraire desir.
Mais deux en un
Ont en commun
Un eternel plaisir:
Et n'est aucun
Qu'autre en vueille choisir.

Si faute à l'oeil on treuve
On la peut amender,
Et par une loy veuve
On luy peut commander:
Mais qui le cueur espreuve,
Il ha beau demander:
Amour discret
Vit en secret,
Bien qu'un regret
Soit tousjours prest
Pour le cueur entamer,
Qui le surprend
Et si luy rend
Un mal tousjours amer:
Mais tant soit grand
Ne laisse point d'aymer.

Au sein de mon ennemie
Jadis ma muse endormie
Par somnolente paresse,
Ignare estimoit cela,
Ne voulant ailleurs que là
Rire, ny faire caresse:
Mais regardoit droictement
Vers l'oeil qui sa flamme attise,
Ainsi que le dur aymant
(Guide au nocher) vers la Bise.

Jusques à ce que la tienne,
Par ses vers tira la mienne
Du fond de l'aveugle somme:
Et à ce nouveau reveil,
Luy donna ennuy pareil
Que le jour aux yeux de l'homme:
Quand sa plus vive splendeur
Se present' à luy subite,
Sortant de la profondeur
Des prisons, ou il habite.

Lors un desir qui s'allume
Sur le pinceau de ma plume,
M'invita à paindre un' Ode:
Encor ne pouvoy choisir
Le doux repos du loisir
Lieu, propos, ny temps commode:
Toutesfois le reculer
Trop long, envers toy m'accuse:
Et au long dissimuler
Trouver je ne puis excuse.

Plume qui bassement volles,
Et bas traynes mes parolles
Prens l'aer froissant la closture:
Contre le rebelle frain,
Va ores d'un front serain
Jusques au ciel de Mercure:
Et vise de ne saillir
En grand precipic', et honte,
Que de poeur fasses pallir
Le noir esmail de la fonte.

Tout oyseau prend la vollée
Sans peril en la vallée,
(Le vol trop haut ne prospere)
Icare sceut bien cela,
Quand ses aisles esbranla
Contre le veuil de son pere.
Qui trop haut se veut renger,
Sa fin est tousjours douteuse,
Vivre ne peut sans danger,
Et sa cheute est plus honteuse.

Ait il l'aisle forte, ou molle
Oyseau est dict, mais qu'il volle,
Et brancher aux hayes puisse:
Ceux là, ceux là sont des miens,
Aussi entre pigméens
Estre petit n'est pas vice:
C'est dont en bas styl' icy
Chanter veux la controverse
De ta grand' vertu, aussi
De Fortun' à moy adverse.

Bien que la chose merite
Estre depainct' et escripte
Par autre main que la mienne,
Au moins de l'une des trois,
Desquelles je ne voudrois
Choisir autre que la tienne,
Paignant les vers bien uniz
Et les Rithmes immortelles,
De la plume du phenix
La plus riche de ses aisles.

Vertu princesse asservie
Aux aguillons de l'envie,
En ses pas simple, et modeste
Fixe tousjours s'entretient,
Et la vie qu'elle tient
Est tesmoing de tout le reste:
Mais (car souz un voille noir
Envie la rend obscure)
Le monde ne la peut veoir:
Ou si la veoid, n'en ha cure.

Sa beauté sans fard se monstre,
De soymesme elle s'accoustre,
De soymesme ell' est aornée:
Et ses filz pleins de bon heur,
Merite, gloire, et honneur
La tiennent environnée.
Mais comme bastardz, conceuz
En grand vituper', et honte
Sont rejettez, et d'iceux
Le monde n'en fait point compte.

D'ailleurs fortune logée
En place mal assiegée,
Tenant geste sourcilleuse,
Un de ses piedz va haulsant,
A tous costez balancant
En son estre perilleuse:
Toujours crolle cà, et là
Sa pierre mobile, et ronde:
Et semble que l'oeil ell' ha
Dessus tout l'univers monde.

Des fiers lions ha la gueule,
Aussi devor' elle seule
Les plus hauts biens: et son ventre
Sent le bouq, bouq est aussi
Chacun, et se sent ainsi
Qui en prosperité entre:
Serpente est l'extremité
De mortel venin noircie,
Des pieds ha la sommité
Semblant au nom de Licie.

De ses deux mains l'une est bresve,
L'autre longue ayant un glaive
Pour diviser les richesses:
Mais (trop aveugl' en son faict)
N'egalle les parts que fait
Du butin de ses largesses.
Ceux à qui visage humain
Elle monstre (la perverse)
Les eléve d'une main,
Et de l'autre les renverse.

Les chefz Royaux environne
De mainte, et mainte coronne
Qu'elle ourdist: Et des hautz sceptres
Garnit leurs mains: Et leurs filz
Souvent ne sont point assis
Au trosne de leurs ancestres.
L'un mect bas, l'autr' en hautz lieux
Pour un temps donne l'entrée:
L'un ha pir' et l'autre mieux
Bien qu'ilz soyent d'une ventrée.

Ceste folle ha grand' sequelle
De gens qui vont apres elle
Pour dorer leur esperance,
Mais comme fumée au vent
S'evapore bien souvent
Avec sa perseverance:
De ses thresors embellit
Les piedz legers de sa fuytte,
En qui l'espoir s'envieillit
Courant tousjours à la suitte.

Elle me tir' à grand' force
Par la corde que j'ay torse
D'un desir, mais l'effrontée
La faveur que me promet,
De moy encor ne permet
Que soit experimentée:
Dont puis que veut tant vexer
Des desirs la vieille trouppe,
Certes mieux vaut la laisser
Et que la corde je couppe.

Mes jours serains luy desplaisent,
Et mes plus obscurs luy plaisent
(De mon bien trop offencée)
Ce que je veux ne veut point,
Et voudroit bien en ce poinct
Mettre loy à ma pensée:
C'est pourquoy usant du fin
Contre la volonté mienne,
Je desire mal, à fin
Que le contraire m'advienne.

Vertu en mespris tenue
De fortun', est revenue
Posseder sa digne place:
Mais la felonn', ha bien sceu
La chasser avec le feu
De sa temerair' audace:
Souz les piedz, encor plus bas
La tient esclav': et l'envie
En est garde, et ne veut pas
Qu'on manifeste sa vie.

Qui souz vertu se veut mettre
Ne peut que droicturier estre:
Car elle n'est point coustiere:
Il vainc les maux angoisseux,
(Vertu aussi entr' iceux
Demeure saine et entiere)
De maints soucis est battu,
Et pauvreté l'importune:
On void aussi la vertu
A la porte de Fortune.

Nonobstant leur resistence,
Avec toy font residence
Par amour appariées:
Mais c'est le vouloir de Dieu
Qui veut qu'en si digne lieu
On les trouve mariées:
Toutesfois les parts des biens
Sont encores trop petites,
Car plus grands seroyent les tiens
Les librant à tes merites.

Ma muse encor alourdie
De son vieil somme, ha ordie
L'Ode que je te presente,
Tesmoing de ma volonté
De te veoir plus haut monté
Que ta fortune presente:
Et venu aux derniers bords
De ton heur, si prend envie
Aux soeurs, ne me chaut si lors
Couppent le fil de ma vie.

Si en ma langu' estoit le dueil
Et que visible fut à l'oeil
Comm' au cueur secret je le porte,
De regret que Pluton auroit
Encor' un coup il ouvriroit
Les verroux qui ferment sa porte,
Permettant en tirer l'esprit
De ton erudic', ou abonde
Tant d'honneur: mais laissant le monde
Son chemin en ces lieux ne prit.

Et croy bien que le piteux son
Qui de mon triste cueur derive.
Esmouvroit aussi le poisson
Qui porta Arion à rive
A rompre les flotz du soucy,
Lesquelz se pressent tout ainsi
Que sur mer quand le vent arrive.
Mon ame doncques flestrissant
D'ennuy qui tant la va pressant
Pour un temps ha esté ravie,
Et au corps qu'elle abandonnoit
Attachée ne se tenoit
Que du moindre fil de la vie:

Mais d'un train royde s'en volla
Sur les aisles de sa pensée,
Et comme si fust insensée
Divers chemins prind cà et là:
Se hastant par les vagues lieux
Trop plus que l'aigle avec sa proye
Allant jadis offrir aux Dieux
La plus rare beauté de Troye:
Et panchée à son corps disoit
Heureuse ceste Ecthase soit,
Qui le jour des secretz m'octroye.

Ores bas, ores volloit haut
Par dessus l'element plus chaud
En vollant la sente embrasée:
Et souz elle laissoit loing, loing
L'arc qui fut de la paix tesmoing
Quand l'eau eut la terre rasée.

Et de là se plongeant en l'aer
Le fendit d'une aisle baissée,
Sans que vers sa maison laissée,
Encores desirast aller:

Mais allant front à front du vent
Vint par rencontr' en la montaigne
Qui bien haut son chef va levant,
Et en mer ses racines baigne:
Mais si loingtain estoit cela
Que Navire onq n'aborda là,
Fust la Caranelle d'Espaigne.

Tout ce que plus à l'homme nuict
Prend vigueur souz la froyde nuict
De ce mont, ou des nuictz la pire
Pour ne recepvoir le clair jour
Les rideaux de son long sejour
(Tant soit peu) jamais ne retire.

Des crys qu'on y oyt, vient horreur,
De l'horreur poeur, de poeur la fuyte,
Mais mon ame fit grand' poursuite
De scavoir d'ou venoit l'erreur

Parquoy trenchant l'aer obscursi,
D'un vol contrainct est arrivée
A l'huis de mort: la mort aussi
En ce lieu tousjours est trouvée,
Et subgectz au pouvoir qu'elle ha,
Faut que trestous passent par là
Quand la chair de vie est privée.

L'huis est grand, et grand faut qu'il soit
Causant les tourbes qu'il recoit
De ceux qui la vie abandonnent.
Là est le grand nombre arresté
De tous les maux qui ont esté,
(Ceux j'entendz qui la mort nous donnent.

Là se combattent les humeurs,
La fievre aussi sans cesse y tremble,
Et du venin qu'illeq' s'assemble,
Se font prestiferes tumeurs:

Les trois soeurs, en pareil y sont
Par qui l'am' est du corps ravie,
Ou de leurs cizeaux rouillez font
Les coups qui abbregent la vie:
Quand l'une la veut allonger
L'autre s'efforce à l'abbreger,
Esmeues de contraire envie.

Celle des petis et des Roys
Est torse par l'une des trois:
L'autre charpit, et l'inhumaine
Couppe de son mortel cizeau
Le filet ou pend le fuseau
Ou se plie la vie humaine,

Dont pareil nombr' on trouve là
Que de vivans, sans la grand' trouppe
Que de jour en jour elle couppe
Mais compte ne faict de cela.

Ceux qui sont de maux entachez,
Leur filace est de noudz garnie,
Et les vices y attachez
La rendent grosse, et mal unie.
On congnoit au contraire aussi
Ceux là qui ont leur vie icy
De vertu riche et bien munie.

Or quand la troupp' apperceu m'eut,
Un debat entr' elles s'esmeut
De la vie, en ceste guerre
Quand l'une la venoit filer,
L'autre venoit l'anichiler,
Pour rendre deserte la terre.

De sa main hideuse prenoit
A grands flottes le fil de vie,
Et de coupper non assouvye
Sa colere ne reffrenoit.

Parquoy horrible estoit à veoir
Les effortz des jumelles lames
Si grands, qu'elles avoyent pouvoir
D'un seul coup ravir cent mill' ames,
Dont cuidoy (en ayant veu tant,)
C'estre la fin que lon attend
Par les inevitables flammes.

A cest esclandre l'oeil volla
Loing, loing vers Gaulle, et congneut là
De son Roy la preuse conqueste,
Ou l'honneur d'Espaigne arrachoit,
Et ainsi qu'un lyon marchoit
Jouïssant du fruit de sa queste:

Des corps morts à son loz dressant
Les montjoyes de la victoire
Qui ja unir font à sa gloire
Les deux cornes de son croissant:

Car vers le fleuve des Germains
Desja il se recourbe, et arque:
Et si menace les Romains
Du pouvoir de ce grand Monarque:
Dont le glaive en pais allegeant,
Aux durs conflictz va soulageant
Les cizeaux de la fiere parque.

Leur fureur apres destournant,
Et contre Gaulle la tournant,
Luy survint un leger esclandre
Au pris des grands maux assemblez
Qui (comme feu parmy les blez)
Ses haineux les verront descendre:

Tant seront alors descouppez
A l'abord des forces terribles:
Et apres ces troubles horribles
Doit naistre une nouvelle paix,

Que nostre prince tresheureux
Plantera sur la terre ronde,
Et les hommes l'auront entr' eux
Tant qu'ilz seront vivans au monde.
Lors vivront tous souz mesmes loix
Ausquelles Germains, et Gaullois
Feront que leur vie responde.

Par les coups donnez à travers
Elles font de meurdres divers
Cà, et là en mainte contrée,
Et couppant leurs filetz bien tordz
La vie (helas) enclos' au corps
De Philiponn' ont rencontrée!

Qui voyant sa chair au sercueil
(Faict' à la mort nouvelle proye)
S'en rirent car toute leur joye
Est de remplir noz cueurs de dueil:

Reffroignans leurs ridez museaux
Monstroyent des dentz un, et un ordre
Rouillez non moins que leurs cizeaux,
Et moussez ainsi par trop mordre.
Et rians, là se desbatoyent
Des filetz qu'en deux partz mettoyent,
Commencez seulement de tordre.

Si pour ton ame ainsi mourant
Le regret en terre fut grand,
Pour si grand' perte inopinée,
Le ciel tant plus ayse ha esté
De veoir l'esprit en liberté
Ayant sa chair abandonnée.

Là aussi on oyoit chanter
Cantiques tous plains de louange
Pour l'honneur de ce nouveau Ange
Qui là haut se vint presenter.

Ou heureux, entre les heureux
Ou bon entre les bons eut place,
Si qu'alors je fu desireux
Que mon ame du monde lasse
En Ecthase demeurast là
Pour tousjours contempler cela
Ravie de celeste grace.

O Esprit, ô Ange nouveau
Retiré en lieu sainct, et beau
Pour jamais avec tes semblables,
Or es tu heureux mille fois
Pour les plaisirs que tu recois
Interditz aux ames coulpables:

A fin que tout cest univers
Puisse entendre si digne chose,
Au tombeau ou ton corps repose,
De ma main j'escriray ces vers.

Si quelqu'un desire scavoir
Ou est le thresor de ce temple,
Que ce sepulchre vienne veoir,
Et les vertuz d'Anne y contemple,
Son cueur ha l'honneur advancé,
Et comme morte elle ha laissé
De ses moeurs aux autres l'exemple.

Mort, et vertu des le commencement
Ont eu debat, Lecteur, scais tu comment?
Pource que l'une, & l'autre aussi demande
Obeïssance alors qu'elle commande:
Et voudroit bien en ces bas lieux chascune
Maistriser sans avoir maistress' aucune.

Mort sus vertu dominer pretendroit,
Et la vertu sus la mort pretend droict.
Mort de son dard l'homme extermine, et tue,
Et la vertu cà bas le perpetue.

Que faict là mort? à mort l'homme soubsmect,
Et la vertu mourir ne le permect.
Ainsi à veoir l'office qu'elles font
On peut juger combien contraires sont,
Mais certes mieux on pourroit juger d'elles
La controverse: aux funebres nouvelles,
Que je te veux anoncer: car Pastel
Est trespassé: mais fut son trespas tel
Que bien qu'il soit de vie ainsi delivre
Sa grand' vertu par tout le fera vivre:
Bien que soit mort, vif entre nous sera.
Et sa vertu chacun annoncera.

Trois partz de luy sont faictes, trois aussi
Prinses les ont, car son nom esclarsi
Vit entre nous, l'ame est avecques Dieu,
Et au corps mort Tholouse ha donné lieu:

Sa destinée ainsi l'ha ordonné,
De ne mourir au lict ou il est né:
Et c'est à fin que le commun remord
Entrant au cueur par la veue, et l'oreille,
Ne redoublast: aussi seroit merveille
En mesme lieu le trouver vif & mort.

Cy gist, à qui Dieu mercy fasse,
Une qui en beauté de face
Jadis la souveraine estoit
Quand pres d'un autre se mettoit.
Grace avoit, mais certes, non point
Tant que de graisse et d'en bon poinct:
Ses tetins au marcher trembloyent
Et ses deux joues ressembloyent
Aux champignons rondz, fraiz, et druz
Qui d'humeur trop grande sont creuz.
Juger ne puis le nombre d'ans
Qu'elle avoit ou seroit aux dentz,
Car estoyent encore si menues
Qu'à leur deu n'estoyent parvenues.
Et de form' estant si exquise
Nul estoit de qui fust requise
Nul estoit qui en eust affaire,
Quoy qu'elle sceust dire ne faire.

Fille vesquit, et fille est morte
Car ne peut en aucune sorte
Entrer au sainct noeud conjugal
Soustenu d'un vouloir egal.

Ainsi morut non mariée
D'envie d'estr' appariée
A quelqu'un pour la desgraisser:
Et ne pouvant rien avancer
En ces lieux de son mariage,
En l'an vingtiéme de son aage
S'en alla vierge pur' et munde
Se marier en l'autre monde.
Encores je suis adverty
Que si n'y trouve tost party
Elle reviendra par decà
Prenant ce qu'en terre laissa,
A fin d'amortir sa grand' flamme,
Et l'envie qu'ha d'estre femme.

Cy gist Catin (dont suis marry)
Et à fin que ce mal ne celle
Sachez qu'ell' est morte pucelle
A faute de trouver mary.

Perolet ce beuveur insigne,
Qui aux yeux en portoit le signe
Evident, repos' en ce lieu,
Non point son vin, mais bien en Dieu:
(Au moins comme chascun doit croire)
Vivant il ayma tant à boire
Du meilleur, souvent, et longs traicts,
Que ses yeux s'en estoyent entrez
Au plus profond, et là dedans
Se monstrent rouges, et ardans:
Rouge, blanc, et claret aussi
Pour couleurs il avoit icy:
Roug' estoit aux yeux, pasl' en face,
Claire avoit sa voix, dont l'espace
Qu'il vesquit, cria cà, et là
Bon vin à vendre, et en cela
Passa son temps vineusement,
Vivant le plus joyeusement
Qu'il pouvoit sans estre delivre
De l'humeur qui le rendoit yvre.

Or passans qui trouvez saveur
Au bon vin comme ce beuveur,
A fin que desormais se garde
Que soif alterée ne l'arde,
Je vous pry arrosez sa tumbe
De bon vin, et faittes qu'il tombe
A plains pots sur luy, car le peu
Ne feroit qu'augmenter son feu.

Quant à l'eau que l'Eglise donne
A grand' pein' il la trouve bonne,
Car si onq n'ayma liqueur telle
Trouver ne pourroit goust en elle.

D'oraisons qu'on dit pour les ames
(A fin qu'evitent les grands flammes
D'enfer hideux, ardant, et chaud)
En veut peu, car il ne luy chault
D'estre là, ou en purgatoire,
Moyennant qu'il y trouv' à boire.

Pour vous louer si la plume je prens,
Roy des grands nez, Roy des nez les plus grands
De Naserie, à ce faire m'invite
Le vostre, auquel tout le peuple court viste
Pour l'admirer, comme rare spectacle,
Si qu'on le jug' estr' un Nasal miracle:
Tant il est grand, que des Archers le pire
Ne le pourroit faillir pour mal qu'il tire:
Et s'il trouvoit au monde son pareil
Croy qu'il feroit eclipser le Soleil.

Ceux là qui ont donné louange aux nez,
Et doctement nous les ont blasonnez,
Ne cuident point que je leur veuille oster
Aucun bruit leur, pour au mien l'adjouster:
En grave stille ilz [nous] ont exposée
La dignité de la tourbe Nasée,
Ou les moyens leur ont estez ouverts,
Autant qu'au monde y ha de nez divers.

En grave stille ont loué les Naseaux,
Le trait, le teinct, de ces nez damoyseaux,
Sus qui on void mille beautez escloses,
Proprement faicts pour odorer les roses.
Mais je veux prendr' autre subjet plus digne
Dont vous portez au visage le signe
Roy bien nasé, et pour mieux le toucher
Je veux ma muse en tel poinct emboucher,
Que ses propos hautement entonez
Soyent à l'egal du Colosse des nez,
Lequel pour estr' excellent dessus tous
Les nez qui sont, & seront, fait que vous
Estes le Roy, & tant plus grand se void
Tant plus grand Roy aussi dir' on vous doit.

Dire on vous doit grand Roy, aussi vous l'estes
Roy sur autant que se trouvent de testes
A croc, et dont la grandeur Cesarée
Va per à per avec la Nasarée:
Mais qui pourroit en ce monde regner
S'il n'ha le nez qu'on ne puisse empoigner
Comme le vostre? ô Nasifique sire.
Perse jadis apres la mort de Cyre,
Autre en son lieu recevoir ne voulut,
Qu'il ne l'eust grand, et vouloit qu'ainsi l'eust
Non seulement pour le loz immortel
De leur bon Roy Cyrus, qui l'avoit tel,
Mais pourautant que l'autorité toute
Resid' au nez: ainsi il n'y ha doute
Que tant plus grand est le nez, plus est grande
La majesté sur la Nasalle bande.
Seroit ce bon que ces nasateux là
Eussent pouvoir sur les grands? Ah cela
Viendra plus tard que lon ne verra estre
Le chat du chien, et le rat du chat mestre.

Or ha la Perse honoré les grands nez,
Tant qu'elle vint à Nabucodenez.
Et vint à luy, Car comme à son nom touche
Ensembl' avoit et grand nez, et grand' bouche:
Mais de la bouch' à present je ne traicte.
A propoz donq des grands nez je m'appreste
A vous narrer un secret difficil,
Pourquoy mandé fut Ovid' en exil,
C'est pourautant que son grand nez faisoit
Trembler Auguste, et pour cela n'osoit
Laisser les murs de la vill', ayant doute,
Que par son nez il ne l'occupast toute.
Mais l'envoya aux neiges de Scytie,
Pour en secher de froid une partie,
Et le secher si bien qu'à son retour
A l'Empereur ne feist ce mauvais tour.

Pourquoy mect on au chef imperial
L'Aigle si n'est qu'ell' ha un nez royal,
Qui des oyseaux fait qu'on la nomme royne?
Et l'elephant, sans le grand nez qu'il trayne
Des animaux, si grand roy ne seroit:
Le griphe aussi craindre ne se feroit.
Ne void on point le rinocerot comme
Par son grand nez est craint? Or donques l'homme
Tant plus l'ha grand, et son nez plus loing tire,
Tant plus grand Roy certes il se peut dire.

Qui ha grand nez, ha de parens aux cieux.
Cuidez vous point que le guerrier des Dieux
Ne l'aye tel, et entre nous Aeolle
Quand d'Aquillon vers les Austres il volle,
Que sans avoir un grand nez il desserre
Ses roides vents? vous faschez vous sur terre
Descendez viste aux Enfers, et verrez
Comme Pluton est nasé, là orrez
Comme celuy s'expose à grand hasard,
Qui n'obeit à ce Prince nasard.
Pour faire brief, un nez tres navifique,
Ha majesté royale et magnifique.
Au nez aussi, et non ailleurs ha place
L'honneur de l'homme, et sans luy n'ha point grace.
Tirer le nez à quelqu'un c'est outrage.
Donner au nez c'est esmouvoir la rage,
Le d'eschirer, l'escacher, ou le tordre
Par ce moyen on vient à l'honneur mordre:
Et au contraire un ardeur on presume,
Lors que d'un homme on dit le nez luy fume,
Il ha la mouche au nez, c'est lors à dire
Qu'il est esmeu de grand colere et ire:
Et quand au nez on ne luy peut toucher,
Il monstre bien qu'il ha son honneur cher
Voylà pourquoy Siracuse est prisée
Car elle mect dessus la part Nasée
Estuys de fer pour deffence aux batailles,
Là ou la France arme ses mains d'escailles.
Et ne cuidez qu'elle ainsi l'enveloupe,
Fors seulement de poeur qu'on le luy coupe,
Et comme au Grec vienne à son nez, ou pire
Perdant lequel, il perdit son Empire.
Qui ha le nez contrefaict et bossé,
Trop, ou trop peu, ou poinctu, ou moussé,
Et comme un as de treffles se renfroingne,
Des lieux publicz meu de honte il s'esloigne,
Pour eviter les pernicieux blasmes
Qu'on luy impose, & mesmement les femmes:
Car elles ont ferme foy que ce lieu
Est relatif de cest antique Dieu,
Avec lequel le Cinic plantoit l'homme,
Seul adoré aux verdz jardins, et comme
On dit le pere ayant esgard aux filz.
Qui ha le nez gros, grand et bien assis,
Celuy on peut sans injure vanter
D'avoir un gros et grand pieu à planter,
Ce dont la femme à l'amour usitée,
Par le grand nez est tousjours incitée
A remarquer et veoir en quelle sorte
Pourra jouïr de celuy qui le porte,
Vostre grandeur, sire, doit scavoir gré
A son grand nez: car ce royal degré
Humiliant ceux qui vous sont rebelles,
Attire à soy l'amitié des plus belles.
Certes du nez, comme nez, on pourroit
Dire beaucoup de choses qui voudroit,
Qu'il donne voye aux humeurs du cerveau,
Et au poulmon ministre l'aer nouveau,
Juge l'odeur, tesmoigne le courroux
Quand ronfle, & fronce, ou qu'il espreint ses troux,
Et si orné il est de toute grace
Dont m'esbahy pourquoy l'antique race
Le congnoissant si beau, et si mignon
Ne l'ha faict Dieu comme son compagnon.
Or est cecy à tous les nez commun,
Et pourautant que je n'escris qu'à un
Grand, le plus grand du monde, je delaisse
Ces nasequins dont y ha si grand presse.

A vostre loz j'ay dict qu'avez l'Empire
C'est tout aussi que de vous je puis dire,
Mais pour oster le moyen à certains,
Qui pour un nez qu'ilz ont sont si hautains,
Que tout ainsi qu'il est grand, grans s'estiment,
Et la grandeur du vostre desestiment:
Je veux monstrer qu'il y ha difference
De grand, à grand, & que sans grand offence
Tous les grands nez ne peuvent recevoir
Tiltre de Roy: Ah il feroit beau veoir,
Qu'un nez tortu, un nez laid de tous poinctz,
Un nez bossé forgé à coups de poincts,
Illuminé tigneux, et qui se guinde
A tous costez comme ceux des coqs d'inde,
Un nez remply de troux, et clous avec,
Un nez moulé à la forme d'un bec,
Un nez trop large, un nez que lon admire,
Faict au patron de prouë d'un navire,
Un nez velu rehaulsé de verrues
Espouvantant les enfans par les rues,
Un nez morveux, et de tigue emperlé
Eust tel honneur, c'est trop avant parlé:
Raison ne veut que nom de roy il prenent,
Bien que soyent grans: & s'il avient qu'ilz regnent
Et que leur main de Sceptre soit garnie
C'est une pure et vraye tyrannie:
Car la grandeur du nez s'il n'ha beauté
Ne peut avoir tiltre de Royaulté.

Un nez Royal avant que tel soit faict,
Veut estre grand, poli, beau, et parfaict,
Comme le vostre, auquel furent donnez
Tous les grans biens qu'on peut dire des nez
Ne trouvent autre encor à soy conforme,
Grand, gros, & large, ouvert, & long, en forme
De barbecane ou triangle eminant,
Qui sur un flang de mur va dominant.
Et pourautant qu'il est Roy, ne suffit
Luy faire honneur car honneur sans proffit
Est de neant si on ne touche au but,
Scavoir au loz adjouster le tribut.
Voylà pourquoy un present luy veux faire,
Qui tant plus est propre, ô Roy nasifere,
Pour sa grandeur longuement conserver
Plus me devez de faveur reserver.

Or tout ainsi que vostre nez est rare
Est de besoing, Sire, qu'on le rempare
D'un riche estuy, et jamais ne soit veu
Sans meur conseil, à quoy sera pourveu
Par longs moyens, & apres grans requestes
Comme en Florence on monstre les pandectes,
Ou comme on garde une chose de pris
Qu'elle ne tombe en vulgaire mespris:
Couvrez le donq, Sire, couvrez le donq
De ce beau masque, & ne soit monstré onq,
S'il n'est requis par grand' necessité,
Et soit ainsi de luy, comme ha esté
Du biffront dieu, qui aux fureurs de guerre
Tant seulement se monstroit sur la terre:
Et pour cela je serois fort d'advis,
Que vous usez comme d'un pont levis
A vostre nez, lequel viendrez hausser
Tant seulement pour la guerre annoncer:
Mais est requis que le tout on manie
Avecques rare, et grand' cerimonie.
Et pour ce faire y soyent maistres expres
Qui vostre nez tiennent tousjours de pres
S'il veut souffler, que torches on allume:
S'il veut ronfler, subit qu'on le parfume
Avec encens, et souz luy faut coucher
Grands bassins d'or, quand se voudra moucher.
S'il ha vouloir d'esternuer, je veux
Que lon descharge un gros canon ou deux.
Et quand les jours solemnelz seront proches
Pour se monstrer, que lon sonne les cloches:
Mais à cecy faut un terme plus long
Qu'à Solyman quand se monstre, & adonq
Il estendra ses benedictions
Dessus les nez de toutes nations,
Ou sera bon que les femmes se treuvent
Qui ont vouloir d'engrossir, & ne peuvent.

Or ce joyau avoit en son thresor
Le puissant Roy Nabucodenasor,
Qui à son nez tout expres le feit faire,
Pour s'en servir en un extreme affaire:
Et apres luy en furent possesseurs
De Roy en Roy maintz autres successeurs,
A qui jadis fut ceste piece ostée
Par l'Empereur qui saccagea Judée:
Et la porta en son triomphe, comme
Le plus haut bien qu'il sceut porter à Romme.
Et Belisare en priva les Rommains,
L'avare Grec, puis vint entre les mains
Du fort Selin, à l'heure qu'il passa
L'estroit Bosfore, et s'en vint par de cà
Et Solyman l'ha eu de son ancestre
Qui le garda un long temps, & sans estre
Armé d'icelle, on luy eust fait par terre
Voler le nez d'un coup de cymeterre
Aupres de Bude, et toutesfois ne sceut
Faire si bien qu'ostée ne luy fust,
Pource doutant qu'il ne perdist l'Empire
Avec le nez en seur lieu se retire.

Bien tost apres, ce butin fut trouvé
Par un soldat, j'entends et relevé
Qui le porta à Romme, ou fut vendu
A un Rabin, car ayant entendu
Que le grand Roy Buconasor estoit
Premier de tous qui au nez le portoit
Et s'en servoit ainsi que d'une barde,
Il le fit mettre au Temple en seure garde.
Deux ans apres, ou un peu moins advint
Qu'un Habraim de Juif, chrestien devint,
Qui s'en saisit, ou bien il la changea
D'un nez, à autre: et ce fut car songea
Que sa famille envieuse en seroit
Triste, et pourtant d'un sang bouillant feroit
Tous ses efforts de l'avoir, & le prendre,
Voylà comment son nez voulut deffendre:
Car l'avoit grand, faict à la judaïque,
Et marqueté tout à la Mosaïque:
Mais (qui est pire) un gros fic y naissoit
Qui si avant de jour, en jour croissoit
Que l'estuy fut estroit bien que soit large,
(A tout le moins luy donnoit trop grand' charge)
Dont le vendit, et je l'ay acheté
Pour mettre au nez de vostre magesté.